A Fundación Aquae Querquennae recibirá 50.000 euros da Confederación Hidrográfica do Miño-Sil para unha nova campaña arqueolóxica no forte romano ubicado no encoro das Cunchas, no concello de Bande. O xacemento arqueolóxico conta con campañas arqueolóxicas periódicas de escavación e consolidación que permiten coñecer a vida diaria dun continxente militar romano do século I d.C., asociado segundo os seus investigadores á construción da Via Nova que comunicaba Braga con Astorga.
