Unha escolma da fotografía galega contemporánea tratada a través de pezas documentais sobre as persoas que a fan. Esta é a proposta de Ollar.gal, o web que acaba de presentar Adarme Visual e que recolle vídeos dedicados a Eva Díez, Miguel Vidal, Raquel Calviño, Javier Teniente e Manuel Sendón. Dirixido por David Hernández e con guións de Jorge Lens, a iniciativa preséntase como "un proxecto multimedia de divulgación da fotografía de autor en Galicia" que nace "na necesidade de crear unha plataforma audiovisual que poña en valor e difunda a obra dos fotógrafos e fotógrafas máis salientables da fotografía de creación en Galicia". Segundo adiantan, para alén dos cinco documentais iniciais, a intención "é a produción de máis películas que vaian completando o panorama da fotografía galega contemporánea". O proxecto contou co apoio do Fondo de proxectos culturais Xacobeo 2021.
