Editorial Galaxia publicará un libro de narrativa infantil inédito de Xela Arias.

A Editorial Galaxia ven de anunciar a publicación dun volume inédito da autora á que este ano está dedicado do Día das Letras Galegas. No mes de marzo sairá do prelo dentro da colección Libros para Compartir a obra infantil Non te amola!, asinado por Xela Arias e ilustrado por Luz Beloso. A obra narrativa, ata o de agora descoñecida, ofrece un conxunto de historias unidas por un fío sutil que nos agasalla unha biografía emocional dunha infancia que se proxecta, vizosa, cara os nosos días. As ilustracións de Luz Beloso personalizan nunha Xela Arias cativa o protagonismo da narración.

A publicación supón achegar ás lectoras e lectores de Galicia o único libro de narrativa escrito por Xela Arias e que permanecía inédito ata agora. Un texto que van gozar os máis pequenos da casa pero tamén todos os que queiran achegarse á descubrir a unha autora que se centrou na poesía pero que tamén, como di no arranque do libro, quería escribir para a xente miúda para contarlles historias de como foi un tempo, o seu, dende o convencemento de que as grandes aventuras se viven en calquera época. Segundo avanza a editorial, as primeiras letras de Non te amola! deixan unha declaración de intencións: "Agora na primavera fixen nove anos. Son moitos para non procurar nada de proveito na vida, así que vou escribir un libro".