Os votos do grupo popular permitiron que o Parlamento de Galicia aprobase este 9 de febreiro a Lei de Museos e Centros Museísticos de Galicia. O novo texto regulará o funcionamento de centros públicos e privados da comunidade, aínda que deixa fóra do seu campo de actuación os espazos deste tipo que dependen da Igrexa, do exército ou doutras instancias da Administración do Estado.
A regulación dos tipos de museos (museos, coleccións museográficas e centros de interpretación do patrimonio) e a creación dun novo órgano de coordinación, o Consello de Centros Museísticos de Galicia aparecen como grandes novidades no texto. Ademais, a proposta incide no carácter dos museos como espazos que deben promover a investigación. A oposición denunciou un texto que considera obsoleto e que non regula axeitadamente as peculiaridades do sistema museístico do país.
