O web do Consello da Cultura Galega acaba de publicar o documento de conclusións dos XXII Encontros para a normalización lingüística, que se desenvolveron entre o 16 e o 19 de novembro de 2020 baixo o lema "A integración lingüística como ferramenta de cohesión social". A comisión técnica do Centro de Documentación Sociolingüística de Galicia elaborou este texto no que se destaca que "en Galicia non se están aplicando as políticas necesarias para que a poboación inmigrante poida adquirir competencias lingüísticas en galego".
As conclusións advirten ademais que se "bota en falta unha planificación integral e unha coordinación" en particular no ámbito educativo. Desde a organización dos encontros instan a unha regulación que "non dependan do voluntarismo e a autoorganización do profesorado ou doutros axentes vinculados ao mundo educativo", a pór o modelo de Euskadi como exemplo.
No informe apúntase ademais o potencial non aproveitado do sistema de avaliación CELGA de competencias lingüísticas que "debería deixar de orientarse exclusivamente á preparación de probas CELGA, e ser un instrumento moito máis proveitoso como vehículo de acollemento, integración e cohesión social".
