Unha bolsa dotada de 20.000 euros para apoiar a formación de artistas que teñan Galicia como lugar de orixe. Este é o novo proxecto que acaba de anunciar Fundación María José Jove. As persoas beneficiarias contarán con estes fondos para realizar o Mestrado de Belas Artes que realiza o prestixioso Art Institute FHNW de Basilea (Suiza) durante dous anos. A entidade que convoca a bolsa pagará a metade da achega nun primeiro momento e o segundo ao finalizar os estudos en concepto de adquisición dunha obra que cada bolseira ou bolseiro deberá realizar no curso da súa formación.
Con este proxecto a fundación pretende "contribuír á formación no estranxeiro de artistas nados en Galicia; incentivar a produción visual, promover o establecemento de redes de apoio e canles de difusión dos artistas galegos, así como o cuestionamento e investigación das prácticas artísticas nos seus contextos sociais e o desenvolvemento de novos enfoques e métodos comunicativos".
