Concello da Estrada, Editorial Galaxia e Secretaría Xeral de Política Lingüística botan a andar o Premio Alberte Quiñoi de Álbum Ilustrado, un dos poucos existentes no país dedicados a este tipo de obra. O galardón premiará obras para público infantil, de entre 24 e 56 páxinas e redactadas na normativa ILG. O traballo vencedor será recoñecido con 2.000 euros en metálico e a publicación en Galaxia.
Pola súa banda, o espazo web Afundación TV transmitirá este sábado 16 de xaneiro a terceira edición da FELIIC, Feira da Edición e Libro Ilustrado. O evento pasa nesta ocasión ao formato virtual e achegará desde as 12:30 da mañá un encontro coas persoas que se fixeron cos Premios Castelao de Banda Deseñada 2019/2020: Alberto Vázquez, Begoña García-Alén, Martín Romero e Andrés Magán. Durante a tarde, retransmitirase a partir das 18 horas unha charla con Verónica Grech e Coco Escribano ao redor da obra Women´s club: Art is powerful, con Neves Rodríguez como moderadora.
