A iniciativa Goxo de pano fino reúne poetas da Mariña e de Asturias

A canle web da Vicepresidencia da Deputación de Lugo ten xa publicado o primeiro dos doce vídeos que compoñen o I Ciclo de Poesía Multidisciplinar Goxo de pano fino. O proxecto reúne poetas da comarca da Mariña e do occidente de Asturias a expresarse desde os seus refuxios creativos a través da palabra nas súas diversas formas. A iniciativa conta coa coordinación de Ugía Pedreia e Marina Oural e reúne canda a elas a Quique Roxíos (Roxíos, Bual), Eloy Couceiro (en Valdepares, El Franco), Milio López (en A Escabelada, Pousada, Lourenzá), Olalla Cociña (en Aguieira, A Rigueira, Xove), Moisés Cima (en Mouguías, Cuaña), Vanina Bailone (en Mexota, Tapia de Casariego), Miguel Rodríguez Monteavaro (en El Valle del Salgueirín, A Cruz, Bual), Eva Rosado (no Mirador de Santa Gadea, en Castropol), Alejandro Fernández (en Viavélez, El Franco) e Kiko Poe (en Fuentes Cabadas, Bual).

Segundo explica a organización do ciclo "o fío conductor é a liña de pensamento entre o íntimo do individuo que se engarza coa sociedade actual, convertendo o verso en patrimonio contemporáneo vivo desde a expresión popular e o espazo natural. As creacións no Goxo randean coa investigación da arte vinculada ao espaczo físico rural: un arquipélago diverso da poesía, corpo social, legado e compromiso cultural coas marxes que se tocan". Quique Roxíos e Eloy Couceiro protagonizan a primeira entrega desta experiencia.