As estrelas Michelín galegas premian a proximidade e a sustentabilidade do territorio

14 restaurantes galegos recibiron este ano estrelas Michelín, a distinción máis prestixiosa no ámbito da gastronomía e a máis influínte na proxección internacional da gastronomía dun territorio. Xunto á confirmación de todos os existentes, súmaselles tres novos membros deste clube: Silabario (Vigo), Eirado da Leña (Pontevedra) e Restaurante Miguel González (Pereiro de Aguiar, Ourense). Pero a gran novidade é a consecución dunha segunda estrela Michelín para o restaurante Culler de Pau (O Grove), unha distinción que sitúa ao establecemento meco nun reducido clube de excelencia, e co que se premia á cociña de Javier Olleros, un cociñeiro moi implicado no desenvolvemento local e no mantemento e preservación de especies vexetais e animais, así como dos oficios artesanais. Adicionalmente, a guía Michelín creou este ano as Estrelas Verdes, distincións a aqueles restaurantes con "valores sustentables que forman parte da súa filosofía de traballo". Culler de Pau tamén recibiu unha destas distincións, canda Pepe Vieira (Poio) e O Balado (Boqueixón).