Noia acolle a III edición de V de Viñetas

A III Xornadas de Cómic do Liceo de Noia abre na tarde deste 4 de decembro as súas portas. O encontro contará con obradoiros sobre adaptación de obras literarias a banda deseñada, da man de Pablo Prado e o concept art para animación con Fon. Ademais, Miguel Porto e Fernando Llor presentarán a súa obra Subnormal sobre acoso escolar, e Miguelanxo Prado dará a coñecer o seu último álbum O pacto do letargo. Como remate do programa proxectarase o filme Ponyo en el acantilado na tarde do día 6.

No campo das exposicións haberá unha colectiva dedicada aos clásicos do anime xaponés Miyazaki e Takahata, e outra a facer un repaso dos traballos publicados na revista A viñeta de Schrödinger. O o humor gráfico de Kiko da Silva en El Correo Gallego, o labor dos debuxantes Miguel Porto e Pablo Prado e mais o traballo do guionista Fernando Llor protagonizarán cadansúa mostra individual.