A Sede do Consello da Cultura Galega en Santiago de Compostela acolle este 5 de novembro a celebración do XVII Simposio O libro e a lectura. A Asociación Galega de Editoras organiza este encontro que se retransmitirá en liña que se centra nesta xeira na problemática da edición en linguas minorizadas.Por mor da situación sanitaria, o encontro non admitirá público presencial.
Víctor Freixanes, presidente da Real Academia Galega, abrirá o Simposio, que continuará cunha mesa redonda de editoras independentes do noso país coa presenza de representantes de Alvarellos, Cuarto de Inverno e Irmás Cartoné. Durante a tarde presentarase o relatorio "O futuro do sector do libro despois da pandemia. Perspectiva da edición en catalán e en éuscaro", a cargo de Montse Ayats, presidenta da Associació d’Editors en Llengua Catalana, África Ramírez, presidenta da Associació d’Editors del País Valencià e Joxemari Sors, presidente de Euskal Editoreen Elkartea.
