A madrileña Sara Plaza gaña a XXXIIIª edición do Premio Pérez Parallé de poesía

Todos os pasos fan ruído é o título do poemario gañador da XXXIII edición do Premio Nacional de Poesía Xosemaría Pérez Parallé convocado polo Círculo Mercantil e Industrial-Uni­dade en Fene. O xurado elixiu de entre os 76 libros presentados a este certame de busca e novas voces poéticas o de Sara Plaza Moreno, natural de Madrid e que, segundo eles comunican, aprendeu o galego de xeito autodidacta e vive desde 2019 en Lugo, onde cursa un mestrado de pedagoxía dos espazos naturais na USC. O premio consiste na publicación do volume e 3.000 euros en metálico. O xurado estivo integrado pola poeta Lucía Novas, a crítica literaria Iris Cochón e Carlos Lixó, gañador do certame en 2017. O acto de entrega está previsto para o vindeiro día 21 de novembro, en Fene.

Premios fallados e entregados en Vilalba
A localidade chairega de Vilalba volveu colocarse estes días tamén no epicentro da literatura co fallo do IVº Premio Agustín Fernández Paz de narrativa infantil e xuvenil pola igualdade e a entrega do premio do XLVI Certame Literario . Iria Misa Peralba (Gondomar, 1983) foi a gañadora desta edición do Premio Agustín Fernández Paz convocado polo Instituto de Estudos Chairegos, o Concello de Vilalba e Edicións Xerais de Galicia. Misa Perlaba obtivo en 2016 o Premio de Literatura Xuvenil Jules Verne. A obra A cidade do átomo foi a elixida polo xurado, que salientou a alta calidade media das obras presentadas e recomenda tamén a publicación de outros tres orixinais presentados ao certame. Respecto a obra gañadora dos 3.000 euros e publicación, A cidade do átomo o xurado destaca a orixinalidade do tratamento do tema, a paisaxe abandonada da cidade ucraína de Prípiat, tras o accidente o 27 de abril de 1986 da central nuclear de Chernóbil. Destaca ademais a nivel estilístico a alta calidade da lingua empregada, así como a amenidade dun relato no que se mesturan textualidades diversas, que pode interesar a lectores de calquera idade. Nun acto celebrado no concello chairego entregouse tamén o premio de 7.000 euros a Xerardo Quintiá, pola súa obra Obra inacabada de Dosinda Christensen, correspondente ao XLVI Certame Literario de Vilalba.