"Vestir épocas" fai dialogar na Coruña a roupa e os cadros de época

Unha pasarela deseñada por Fernando Agrasar introduce os visitantes do Museo de Belas Artes da Coruña na exposición "Vestir épocas", unha viaxe ao redor de 300 pezas de vestiario do que é a maior colección privada galega no téxtil, a da familia coruñesa González-Moro. Trátase de roupa que vai de 1860 a 1960 e que se dispoñen nas salas en contexto con obras de arte contemporáneas a cada unha delas, procedentes do fondo do Museo de Belas Artes, a partir das cales se establece un diálogo entre "a idealización da arte e o realismo da roupa". A exposición foi comisariada por Román Padín e estará aberta ata o 14 de marzo de 2021.