Motivos representados na Pala das Cabras. Fonte: Sputnik Labrego
A revista de investigación Complutum publicou esta semana a primeira investigación sistemática das pinturas do abrigo da Pala das Cabras (Casaio, Carballeda de Valdeorras), descubertas a principios de 2019 polo equipo arqueolóxico Sputnik Labrego mentres investigaba acubillos guerrilleiros da Guerra Civil. Segundo os arqueólogos Manuel Sántos-Estévez, Carlos Tejerizo-García e Francisco Alonso Toucido, canda os motivos xa coñecidos do Calcolítico coma os ídolos oculados (que apareceran por primeira vez en territorio galego) e que foron pintados durante o Calcolítico (no terceiro milenio antes de Cristo), a Pala das Cabras garda tamén outras formas que se remontarían moito máis atrás, ao Neolítico, é dicir, hai sete mil anos. Por agora é só unha hipótese pendente de máis estudos, segundo os investigadores, que agardan obter financiamento para continuar co proxecto.
