Cando un forte romano volve á vida

Onte foi presentada unha ambiciosa recreación virtual do forte romano de Aquis Querquernnis (Bande, Ourense), financiada polo proxecto #Gerês #Xurés Dinámico, unha iniciativa para posta en valor da Reserva da Biosfera Tranfronteiriza promovida pola Deputación de Ourense con fondos do programa europeo INTERREG. Trátase dunha recreación fidedigna dos edificios do forte romano, pero tamén da vida da guarnición militar que habitaba nel e as súas relacións coa poboación indíxena local. A través da combinación de modelos 3D e actores reais, os vídeos, con subtítulos en galego, castelán, inglés e portugués, permiten explorar os barracóns, a vía romana, o cuartel xeral, o hospital, os hórreos ou as portas de acceso. O proxecto complétase cun web con recursos educativos e unha app que permite a autovisita guiada do xacemento arqueolóxico, visualizando as recreacións in situ. No proxecto participaron empresas como Mystic Design e Vsion Studio co asesoramento da Universidade de Santiago de Compostela.