Carlos Labraña gaña o IIº Premio Platta de Teatro Breve en galego

O dramaturgo Carlos Labraña resultou gañador do II Premio Platta de Teatro Breve-Galicia coa peza Descociñando. O premio está convocado poña Plataforma Transfronteiriza de Teatro Amador, da que participan a Federación Galega de Teatro Afeccionado, Federación de Grupos Aficionados de Teatro de Castilla y León, Teatro do Noroeste-Centro Dramático de Viana e Revista Galega de Teatro erregueté. O xurado valorou "a prolífica configuración dos personaxes e a identificación con eles, a utilización de mecanismos como a intriga que mantén o interese e a curiosidade da lectora, o uso de metáforas que ilustran os estados de ánimo do personaxe principal e o sorprendente final purificador tinxido pola comicidade deste drama", segundo transcribe Erregueté. O texto será publicado na colección PLATTA en galego, castelán e portugués, dentro das actividades da Plataforma Transfronteiriza de Teatro Amador. Ademais da súa publicación, o texto será o material de traballo das lecturas dramatizadas que terán lugar no mes de novembro dentro do marco do Festival Transfronteirizo de Teatro Amador organizado pola Federación Galega de Teatro Afeccionado.