A segunda edición de Nortear Ilustrado chega a San Simón

Desde este 8 de outubro e ata o día 10 a Illa de San Simón acolle a segunda edición do programa Nortear Ilustrado. Esta residencia artística, que busca estreitar lazos entre o sector da ilustración de Galicia e de Portugal, reúne neste espazo a Iria Fabián e Leo Sousa por parte do noso país e a Francis.co e Eva Halfers da banda de Alén Miño.

Ao longo da súa estadía, o cuarteto desenvolverá un proxecto conxunto "en forma de diario de viaxe que incluirá apuntes, texturas e imaxes da illa e que seguirá un fío condutor común", segundo explica a Consellería de Cultura, que promove a iniciativa en colaboración coa dirección rexional de Cultura do Norte de Portugal e o Agrupamento europeo de Cooperación Territorial da eurorrexión Galicia-Norte de Portugal.

Para alén do seu labor creativp, as catro persoas participantes recibirán o alumnado da EASD Pablo Picasso, que participarán nun taller de debuxo do natural. Coas obras resultantes do mesmo preténdese desenvolver unha historia gráfica sobre a illa.