Lorena Conde gaña o 36º Premio de Poesía Cidade de Ourense

Con As puntas da Louza. Cancioneiro popular de labor Lorena Conde ven de resultar gañadora da 36ª edición do Premio de Poesía Cidade de Ourense, que convoca o Concello. O certame premia o mellor traballo inédito e orixinal escrito en lingua galega ou portuguesa. Está dotado cun premio de 6.000€ e a publicación da obra gañadora. O xurado formado por Cesar Lorenzo (crítico literario), Edelmiro Vázquez (poeta ourensán) e Charo Lopes, gañadora de edición pasada, destacou a "calidade lingüística e a estética coidada" da obra, así como “a coherencia no discurso que soubo visibilizar a inspiración nas formas tradicionais da música tradicional e relixión, reformulándoas dunha maneira transgresora”. Subliña tamén a voz poética "que amplía o imaxinario falando desde a subalternalidade, introduce na poesía galega o problema das mulleres obreiras e coloca os coidados no centro facendo unha lectura contemporánea da dificultade da conciliación. En definitiva, unha poesía que conmove e non deixa indiferente", segundo a comunicación do Concello de Ourense. A escritora de Pontesampaio (Pontevedra) Lorena Conde remata así o mes de setembro acadando un segundo galardón tras ter gañado o III Premio María Victoria Moreno de relato.