Investigarán o xacemento de San Tirso de Portocelo en Xove

Nun espectacular emprazamento da costa da Mariña atópase unha ermida en ruínas, San Tirso de Portocelo, construída sobre un antigo castro que aínda conserva o seu foxo. No lugar estivo posiblemente emprazado un mosteiro medieval construído por un diácono de Coímbra que fuxira da invasión musulmana a finais do século VIII. Agora, o concello de Xove contratou unha intervención arqueolóxica que ten por obxectivo coñecer máis sobre o xacemento arqueolóxico. Con todo, a intervención realizarase no foxo do xacemento, xa que os terreos do interior, onde se atopan as ruínas da ermida, pertencen á Igrexa. O concello xa adquiriu o ano pasado os terreos que rodean a capela de San Tirso.