O ex-Conselleiro de Cultura Roberto Varela inaugura en Meaño unha exposición coas súas fotografías

Non é habitual poder asistir a un feito cultural onde o artista sexa un político, neste caso trátase máis ben dun ex-político xa que Roberto Varela (Meaño, 1959) leva varios anos lonxe da actividade políticas desde que deixou de ser Conselleiro de Cultura no 2012, retomando a súa carreira diplomática. Agora ven de inaugurar nun espazo privado, o hotel e restaurante Quinta de San Amaro, no seu pobo natal, Meaño, unha exposición de fotografía da súa autoría. Le silence é o título desta mostra fotográfica que se creou durante o período de confinamento na súa vivenda en París, onde Varela reside coma Conselleiro de Asuntos Culturais da embaixada española. Afeccionado á fotografía desde cativo, Roberto Varela plasmou en imaxes unha etapa dura marcada polo silencio da paralización da vida que significou ese confinamento durante o cal, o ex-conselleiro perdeu a súa nai e, coma tantos outros, non puido estar ao seu carón. A exposición é o prólogo dun libro un libro que verá a luz en breve publicado pola editorial Chan da pólvora. Segundo un comunicado emitido polo diplomático, "é unha exposición modesta, sen pretensións, que quere poñer de manifesto unha faceta miña que sempre me gustou e, por primeira vez e sen querelo, tiven tempo porque, pese ao teletraballo, cando todas as actividades culturais foron suspendidas un queda como en branco". O que foi conselleiro de Cultura no primeiro mandato de Alberto Núñez Feijóo, considera que a cultura foi outra vítima coa que a pandemia foi especialmente cruel, e non dubida en afirmar "que a cultura poida saír adiante despois deste golpe está en mans dos políticos".