O Concello de Ourense facilitou a compra de máis de oito mil libros para escolares

A campaña de agasallo de libros aos nenos que realizou ao Concello de Ourense rematou cun saldo de 8.400 libros entregados para outros tantos escolares. Ao longo das últimas semanas, todos os ourensáns nacidos entre o xaneiro de 2002 e decembro de 2016 tiveron a posibilidade de achegarse a unha das 35 librarías e papelarías ourensás que participaron na campaña e retirar un título da súa escolla. Con estes resultados o goberno municipal valora como un éxito a campaña 'Un libro desconfina a túa imaxinación', que tiña como obxectivo fomentar a lectura entre a mocidade ao tempo que axudar o comercio local e, concretamente, o sector libreiro, moi afectado polo peche decretado durante o estado de alarma.Con esta iniciativa, o Concello quixo agasallar a rapazada polo seu comportamento durante as etapas do peche. A campaña desenvolveuse desde o día 1 de xullo até o 14 de agosto, e contou coa participación de 35 establecementos da cidade, nos que cada neno ou nena podía elixir un título á súa escolla sen requisitos de xénero literario ou lingua por un importe máximo de 20 euros; se o importe superaba esa cifra, a diferenza era achegada polo cliente.Pérez Jácome salienta que a campaña foi pioneira en España, tendo en conta que eran os propios nenos quen elixían o libro á súa escolla, achegándose a unha libraría onde cos seus datos a través dunha aplicación informática se determinaba se lle correspondía o libro, e o propio lector elixía o título que máis lle gustaba. O alcalde subliña que esta iniciativa, "vai coa nosa filosofía de que os impostos teñen que ir para todo o mundo", en relación aos 8.400 nenos que recibiron os seus libros.