Tres manuscritos do Arquivo Histórico Provincial de Ourense serán restaurados

O Boletín Oficial do Estado recollía este 11 de agosto o comezo do proceso de licitación para resturar tres manuscritos conservados no Arquivo Histórico Provincial de Ourense. O Ministerio de Cultura destinará un investimento de 88.000 euros a recuperar "o manuscrito do Foral dos Partidos Xudiciais de Santa Cristina, Luintra, Santo Estevo de Ribas de Sil, Rosende, Pombeiro, Vilar, Toubes e Sobradelo", datado entre 1566 e 1585 e que conta 461 folios. Canda a este, os traballos afectarán ao Tombo ou Declaración da Facenda de San Clodio, datado no século XVIII e composto por 497 folios e mais o Libro de Adega do Mosteiro de San Clodio, datado entre 1671 e 1835, formado por 255 folios divididos en 12 pequenos cadernos.

O anuncio inicia o proceso de concurso para licitar uns traballos que deberán respectar a "identidade, estrutura e elementos orixinais" das pezas ao tempo que estabilizan os danos e frean os mecanismos de alteración con vistas a garantir a manipulación segura dos exemplares, actualmente nun estado de conservación deficiente.