Un festival Noroeste de resistencia que homenaxea a Nonito Pereira e Jaime Manso

Como xa se avanzaba, o Festival Noroeste da Coruña, veu marcado pola pandemia, pero chegou no formato reducido en todos os sentidos, pero resistindo. O Concello da Coruña optou por manter a cita reformulándoa cun cartel integrado por propostas musicais galegas e cunha limitación de escenarios e capacidade de accesos que se celebrará durante tres días comezando este venres 7. Dous escenarios acollerán todos os concertos deste 34 Festival Noroeste XS Estrella Galicia que non se expandirá polas prazas, rúas e pola praia coma ata agora, e estarán situados na Praza de María Pita e no Parque de Santa Margarida (inicialmente especulábase coa explanada de Riazor). Cada un deles estará dedicado a unha das dúas grandes figuras que a cultural musical da cidade perdeu tristemente no pasado ano 2019: Nonito Pereira (escenario na Praza de María Pita) e Jaime Manso (no Parque de Santa Margarida). Serán tres días consecutivos de música, venres 7, sábado 8 e domingo 9, nos que as diferentes artistas actuarán simultaneamente nos dous lugares para evitar a excesiva acumulación.

No apartado artístico, máis copado ca nunca por artistas vencellados á cidade ou galegos compre destacar coma feito histórico a volta aos escenarios do grupo coruñés Viuda Gómez e Hijos, mítica banda dos anos 80 que 28 anos despois recupera a actividade musical. Tamén serán uns cabezas de cartel xa coñecidos no festival os Triángulo de Amor Bizarro. Ademais diso estarán nesta edición artistas da cidade como Pardo, Allova, Moura e a Irmandade Ártabra ou Bush Doctors; xunta eles outros artistas coñecidos do resto de Galicia coma Ataque Escampe, Laura Lamontagne & PicoAmperio, The Bo Derek’s ou Víctor Coyote entre outros. En total tocarán 14 bandas, completando o cartel dous viveiros musicais pensados para que a rapazada descubra ritmos, sons e historias vencelladas á música contemporánea. Como acontece agora polas circunstancias de seguridade sanitaria actuais co resto dos espectáculos, os concertos do 34 Noroeste Estrella Galicia contarán cun aforo limitado a un máximo de 400 persoas. Todos os concertos serán de balde, pero haberá que reservar entrada previamente a través da web do festival.