A Consellaría de Cultura acordou duplicar os fondos dispoñibles destinados á adquisición de obras para o Centro Galego de Arte Contemporánea ata os 200.000 euros. No marco do Plan de reactivación nos sectores cultural e turístico fronte aos efectos derivados da Covid-19, a Dirección Xeral de Políticas Culturais acaba de anunciar unha convocatoria para adquirir traballos de artistas do país por esta contía para as incorporar á Colección CGAC.
Con esta medida preténdese, "apoiar o sector das artes visuais e máis concretamente aos autores galegos/as de obras de arte e galerías de arte da Comunidade Autónoma de Galicia" ademais de "enriquecer a Colección CGAC cunha oferta ampla, diversificada e atractiva de obras que completen os seus fondos e dialoguen con eles". Galerías e artistas teñen ata o vindeiro 24 de agosto para facer as súas propostas, para as que se prevé un máximo de 14.000 euros por obra.
