Os colectivos que representan diferentes ámbitos implicados recibiron xa o Plan de reactivación dos sectores cultural e turístico fronte aos efectos derivados da COVID-19, no que a Xunta detalla medidas de apoio concretas a estes campos. O documento, dispoñible tamén no web do Goberno Autonómico, baralla diferentes escenarios de futuro á actual crise sanitaria e económica. Así, para o ámbito cultural sinala que, nunha perpectiva optimista, "o impacto negativo no sector da cultura estímase entre os 100 e 120 M€ e unha perda potencial de entre 2.000 e 2.500 empregos, o que supón ao redor do 7 % do total, con respecto ao escenario previo á crise sanitaria". Segundo o documento, a situación correspóndese cunha potencial recuperación de actividades e eventos culturais no terceiro trimestres deste ano. Pola contra, "nunha prospección máis pesimista, en relación á dinámica do nivel de cancelacións, do fluxo de gasto público e da diminución do consumo final de produtos e servizos culturais, é previsible que o impacto negativo poida multiplicarse e que o desemprego chegue ata os 11.000 profesionais", advirte o documento.
A Consellaría de Cultura programou para o vindeiro xoves sete de maio ás 17 horas un webinar, aberto á inscrición, para presentar as medidas concretas dirixidas a cada un dos ámbitos afectados. O encontro pretende "achegar información de primeira man sobre as principais medidas de choque, e resolver as dúbidas ou consultas que esta iniciativa poida xerar". O conselleiro de Cultura e Turismo, Román Rodríguez; o director do IGAPE, Juan Manuel Cividanes Roger, o director xeral de Políticas Culturais, Anxo M. Lorenzo, o director de AGADIC, Jacobo Sutil e o secretario xeral de Política Lingüística, D. Valentín García participarán no encontro.
Entre outras medidas, o documento adianta a adaptación e flexibilización de convocatorias de axudas, medidas específicas para toda a cadea do libro, a incluír un reforzamento do sistema bibliotecario ou unha campaña transversal para promover o consumo cultural. Novas propostas de formación e asesoramento para empresas e profesionais do sector ou o emprego do Xacobeo para dinamizar propostas culturais, cun fondo específico ou un novo programa de apoio ao sector escénicos entre outras iniciativas fan parte das accións propostas.
