A Deputación de Pontevedra apoia ao teatro profesional co ciclo 'Prendendo butacas'

A Deputación de Pontevedra apoia a recuperación do teatro trala COVID-19 coa acción "Prendendo butacas", un ciclo enmarcado na programación "Re-Acción cultural" que ofrecerá dez actuacións noutros tantos concellos entre outubro e decembro, a cargo de compañías profesionais da provincia. Os espectáculos abordan diferentes formatos como a performance, a lectura dramatizada, o musical ou o teatro de monicreques e algunhas das propostas están dirixidas de xeito especial ao público infantil. Deste xeito, Vila de Cruces acollerá a actuación de Educa Teatro, coa función Carapuchiña vermella, mentres que A Estrada será escenario da proposta de Butaca Zero titulada Camiños. Doutra banda, A Feroz porá en escena Afterparty en Cuntis; A Panadaría a obra Elisa e Marcela na Illa de Arousa; Viravolta Títeres ofrecerá Todos ao balcón en Moaña; Tanxarina Títeres A galiña azul en Vilaboa; Ibuprofeno Teatro amosará O mel non caduca en Mos; Isabel Blanco, Silvia Penas e Mariana Carballal ofrecerán Literarias en Oia; Baobab Teatro levará Mai Mai a Mondariz e, por último, Cooperactiva ofrecerá o espectáculo Rosalía na Cañiza (A Paradanta). A Deputación ten elaborado un protocolo cunha serie de recomendacións de aplicación para todos os eventos culturais que realizará nas comarcas.