O escultor Xosé Cid recibirá o premio Celanova, Casa dos Poetas

O Padroado da Fundación Curros Enríquez acordou este sábado 18 de xullo outorgarlle o XXXVI Premio Celanova, Casa dos Poetas ao escultor ourensán Xosé Cid. O galardón quere recoñecer "a súa longa traxectoria como intérprete das formas e dos feitos da Galicia tradicional máis auténtica a través da súa obra escultórica, herdeira do legado intemporal dos vellos artesáns da pedra e da madeira, pero sendo quen de detraer daquelas formas os volumes innecesarios para transformalas en auténticas obras de arte", segundo informa a Fundación.

A acta do padroado apunta tamén que "dende a súa condición de creador case autodidacta formado a carón do impulso cultural da factoría intelectual dos "Artistiñas" de Vicente Risco, nos anos sesenta, que o conectan directamente coa Xeración Nós (da que estamos celebrando o seu centenario), o traballo de Xosé Cid ten evolucionado dun xeito pausado, reflexionado e a lume lento, como é el, dende aquelas primeiras obras nacidas de mans aprendices de artesán, ata estoutras nas que a iniciática robusteza que bebe das obras de Antón Failde, muda nunha elegancia singular e nunha pureza formal, sexa ou non antropomórfica, que o definen como un artista con personalidade propia no contexto da pléiade de artistas plásticos da súa e de posteriores xeracións da escultura ourensá".

Paz recibirá o seu galardón nun acto que se celebrará o vindeiro 6 de setembro na Casa dos Poetas de Celanova e no que tamén se lembrará a Celso Emilio Ferreiro con motivo do 41 cabodano da súa morte.