Fotogrametría da inscrición. Imaxe: Adegas da Memoria
A nova campaña arqueóloxica en Os Conventos, un xacemento arqueolóxico da parroquia de Vilachá de Salvadur (A Pobra do Brollón), non puido comezar con mellor pé. Durante as tarefas preliminares de limpeza de vexetal dunha estrutura na que se realizará a intervención, os arqueólogos localizaron unha lousa cunha inscrición. Analizada por expertos en epigrafía, as primeiras conclusións indican que se trata dun texto en latín medieval, anterior ao século XIII, e que abondan na interpretación de que Os Conventos poida ser o desaparecido mosteiro de San Martiño de Piñeira. Esta é a segunda campaña levada a cabo neste xacemento, e desta volta está financiada pola Consellería de Cultura e Turismo da Xunta de Galicia, coa colaboración do concello da Pobra do Brollón e a asociación de veciños de Salvadur. Na primeira, localizouse un enterramento humano datado no século X así como material cerámico medieval. Precisamente, o proxecto "Adegas da memoria" no que se encadra esta intervención foi obxecto dun encontro virtual no Consello da Cultura Galega este martes.
O achado da inscrición
