Desde hoxe ás cinco da mañá, un grupo de ourensáns entre os que se atopan Vicente Risco e Ramón Otero Pedrayo está a camiñar en dirección a Santiago de Compostela, tendo como guía o vello mapa de Domingo Fontán. Cando menos fanno virtualmente, nas redes sociais. Esta é a nova proposta para homenaxear á Xeración Nós durante o ano no que se celebra o centenario da súa emblemática Revista. Entre o 8 e o 12 de xullo de 1926, un grupo de galeguistas percorreron os vellos camiños do país para peregrinar a Santiago de Compostela polo Ano Santo. Da viaxe ficaron as crónicas publicadas polo óptico e activista cultura Xavier Pardo Bedía en A Nosa Terra. Foi a partir deste traballo e da edición realizada por Afonso Vázquez-Monxardín que o Consello da Cultura Galega preparou esta nova versión da viaxe, recreada agora en tempo real, durante os días e as horas orixinais, no twitter e o facebook da institución. Pódese seguir entre hoxe e o día 12 de xullo a través do hashtag #ocamiñodenós.
