Marta Pazos recibirá o Premio de Honra da MIT de Ribadavia

O Premio de Honra Roberto Vidal Bolaño que concede cada ano a Mostra Internacional de Teatro de Ribadavia irá neste 2020 á directora artística e directora de escena de Voadora Marta Pazos. O encontro quere recoñecer así a traxectoria "dunha das creadoras escénicas máis puxantes do panorama teatral contemporáneo", quen "propiciou a consolidación dun equipo interdisciplinar no que priman a música e a suxerente plástica escénica como principais sinais de identidade". A organización destaca da directora o ser "unha das mulleres de gran talento, traballo e entusiasmo da cultura galega actual. Alimenta o noso espírito con pezas que nos fan vivir plenamente a festa da vida, os sabores doces e tamén o ácido existir actual" e apunta que "este premio é a constatación dos valores que fomos descubrindo, do acompañamento que este festival foi realizando, das portas que nos fomos axudando a abrir e do moito que lle queda por voar a esta creadora galega universal".



Pazos agradeceu o recoñecemento a destacar que "a MIT é unha casa á que volver e da que sempre saímos renovadas polo cariño, apoio e os novos horizontes que abren deste esta casa". Avanzou ademais que o vindeiro espectáculo de Voadora, Othello, será unha coprodución con esta mostra. Precisamente arredor de Othello a compañía impartirá un obradoiro escénico sobre "relacións amorosas e a posverdade" co título Celos. Nivel usuario avanzado.