Pistacatro recibe o Premio de Honra Roberto Vidal Bolaño da MIT

A organización da Mostra Internacional de Teatro de Ribadavia daba a coñecer esta fin de semana o fallo do seu Premio de Honra Roberto Vidal Bolaño. A compañía Piscatro foi a escolleita para esta distinción, a recoñecerlle un papel "fundamental para a evolución e a consolidación dun referente das artes do circo e o cabaré na cultura galega actual". Co galardón, a organización quere "recoñecer agora a traxectoria de Pistacatro logo de vir de celebrar o seu décimo aniversario e de afrontar importantes retos e innovacións coma a adaptación á linguaxe circense da novela de Xosé Luís Méndez Ferrín Arnoia, Arnoia ou o espectáculo Orquestra de Malabares" que se poderá ver na propia mostra. O fallo réndelle tamén homenaxe a Manu Lago, membro da compañía falecido o pasado ano. A 35 xeira da MIT celebrarase en Ribadavia entre o 18 e o 27 de xullo vindeiros.