Homeless Home, a última curtametraxe dirixida polo coruñés Alberto Vázquez, conseguiu o Premio do Xurado á mellor curtametraxe no Festival de Animación de Annecy. O filme competía na categoría Cristal con outros 36 proxectos e obtivo o que se considera un dos dous grandes premios do evento para este tipo de producións. O filme, unha coprodución vasco-francesa, segue a liña de animación para adultos coa que Vázquez está a conseguir recoñecemento internacional.
Outra curta de autoría galega, Beautiful Boy, obtivo nos premios Fugaz á curtametraxe española o galardón á mellor montaxe. O rianxeiro Fran X. Rodríguez levou este recoñecemento, ao que a fita optaba canda ao de mellor guión. Rodríguez correu tamén coa dirección do proxecto, ademais de coescribir o guión canda a Marcos Nine. O filme é unha comedia negra sobre "a importancia do noso legado", protagonizada por un coleccionista de 37 anos que decide desaparecer.
