Ramón Sobrino Lorenzo no petroglifo de Conxo. Fonte: Deputación da Coruña.
O fondo de máis de 3.000 imaxes sobre arte rupestre do investigador Ramón Sobrino Lorenzo-Ruzza, considerado unha autoridade neste campo, será dixitalizado. A Área de Turismo da Deputación da Coruña e mais o Colectivo a Rula asinaban o pasado 11 de xuño un convenio polo que a entidade provincial achegará 8.000 euros para financiar "a dixitalización e difusión dun catálogo e exposición do material gráfico de Ramón Sobrino no rexistro dos petróglifos dos principais xacementos galegos. O proxecto inclúe a dixitalización do fondo de máis de 3.000 imaxes, a coordinación, redacción, maquetación e edición dos contidos do catálogo e a exposición", segundo informa a Deputación.
Segundo apuntan tanto Deputación como A Rula, este material resulta fundamental para o desenvolvemento do parque Compostela Rupestre, actualmente en proceso de creación. O presidente do colectivo, Luís Leclere Rodríguez, apuntou o valor, "non só arqueolóxico e científico senón tamén etnográfico e social" do traballo de Ramón Sobrino e sinalou a importancia de "difundilo e entregalo para que a futura musealización conte con este material como punto de partida sen o que non se entendería o proxecto Compostela Rupestre".
