A Casa de Rosalía e o Museo do Pobo reabren as súas portas

Sistemas de seguridade, reducións de capacidade, eliminación de visitas en grupo ou novos horarios son algunhas das medidas coa que abren a súas portas diferentes museos este 2 de xuño. Entre os centros que retoman a súa actividade está o Museo do Pobo, que inicia esta nova etapa cunha xornada de visita gratuíta e un horario continuado de 11 a 18 horas de martes a sábado e de 11 a 14 no domingo. Ademais, a capacidade redúcese a 70 persoas (un terzo da habitual) elimínanse as visitas escolares e guiadas e instaláronse sinais para conseguir un percorrido seguro polas instalacións.



De xeito similar, a Casa Museo de Rosalía de Castro abre tamén as súas portas o 2 de xuño. Tamén cunha redución de capacidade ata 21 persoas e sen visitas guiadas, o espazo mantén o seu horario habitual. Segundo explica a Fundación que xestiona o centro, "o percorrido pola Casa-Museo estará regulado e guiado por marcadores de distancia e indicadores", cun máximo de tres persoas por sala.

Tamén o Concello de Vigo agardou ao comezo deste mes para pór en marcha de novos os seus museos. Quiñones de León, Verbum, Casa das Artes, Casa Galega da Cultura, Pinacoteca Fernández del Riego, Museo Liste e MARCO. Todos eles acollerán visitas individuais ou de unidades familiares, ata un terzo de capacidade e a contar con dispensadores de hidroalcohol e sinaléctica para manter as distancias de seguridade.