A música e o teatro volven marcar espectáculos na axenda próxima en Lugo e Coruñá

A música e o teatro volven ás salas coas restricións propias da desescalada da alarma pero xa hai datas que se poden marcar nunha axenda a curto e medio prazo. No posto de saída desta apertura está este venres 29 de maio a veterana sala lucense Club Clavicémbalo que abrirá as súas portas coa banda local Filophóbicas nun formato de dobre pase. Así, coa capacidade da sala restrinxida na Fase 2 a un máximo de 50 persoas esas serán o número de entradas que se venderán para cada pase e que xa están arestora cuberta máis da metade no último pase. No formato que se propón o público estará sentado e coas separacións esixidas. O grupo subirá ao escenario ás 21:30 horas e repetirá de novo ás 23:30 horas. As entradas custan cinco euros, dos cales 4 son para a banda e un para a sala. A sala ademais reforza a súa intención e manterá a actividade musical o sábado 30 de maio con outro concerto de homenaxe á banda Queen ás 21:30 horas e o vindeiro sábado 6 de xuño ofrecerá o concerto familiar de Pauliña e o Grilo en horario matinal ás 11 da mañá.

Tamén é posible xa anotar unha data na axenda de volta ao teatro en sala. A compañía Elefante Elegante é a primeira en convocar ao público, será os vindeiros 19 e 20 de xuño, no Teatro Rosalía de Castro da Coruña. Alí Elefante Elegante Teatro fara a súa adiada estrea do seu espectáculo de teatro, danza e música Dreaming Juliet. Unha creación de Gonçalo Guerreiro sobre o texto Romeo e Xulieta de William Shakespeare para que estarán sobre as táboas o propio Guerreiro xunto a María Torres, Marta Alonso, Nacho Martín e Miguel Paz. As entradas poranse á venda proximamente contando cunha capacidade de sala aínda reducida para ese momento, que se prevé de ata 70 persoas, segundo as necesidades de seguridade e o previsto na fase 3, malia que está situación podería mudar chegado ese momento dependendo das Autoridades Sanitarias. A obra, que né unha coprodución da compañía co Concello de Culleredo, tiña prevista a estrea para público xeral o pasado 20 de marzo. Arestora Elefante Elegante só ten previsto despois outra representación desta obra en outubro en Vigo. A compañía calcula que debido á alerta o seu número de representacións das obras que ten en carteira non será de máis de vinte, unha cifra moi pequena tendo en conta que o pasado ano fixeron ata 87 representacións e o anterior 110.