Coa intención de canalizar a creatividade e o tempo que a poboación do país está a pasar en confinamento, multiplícanse as propostas de certames e concursos para participar desde a casa. Deste xeito, a Dirección Xeral de Xuventude acaba de lanzar Crea na Casa, un certame que convida a amosar a creatividade doméstica no fogar mediante fotografías en Instagram e que está aberto á participación ata o vindeiro 22 de abril. Pola súa banda, a publicación viguesa A Movida presentou tamén o concurso virtual As túas movidas, no que chaman a desenvolver na casa propostas creativas de calquera tipo a partir dunha palabra que a organización propón semanalmente. Desde a Asociación de Medios en Galego, pola súa banda, lembran que está aberto, ata o 30 de setembro, o prazo para participar no certame de videos, podcasts e regueifas, axeitado tamén para este período de estancia domiciliaria.
Pola súa banda, citas creativas que ata o momento se desenvolvían no espazo público están tamén a procurar alternativas ante a nova situación. É o caso da convocatoria Artelixo de Redondela, que está a facer un chamamento para que as persoas interesadas envíen fotografías das súas obras, feitas como é habitual con material reciclado, para as pór nas redes sociais baixo o lema Artelixo Confinado. A organización pretende levar todo ese material fisicamente ás rúas cando remate o período de confinamento. Ademais, transformou a sesión de micrófono aberto habitual no festival en Parnalixo Confinado, unha convocatoria a enviar poemas e textos sobre o confinamento para difundir nas redes sociais do programa.
Tamén as Balconadas de Betanzos, que habitualmente pon nas varandas da poboación desta vila obras de arte, muda de formato ante a crise sanitaria. O concello, que organiza o evento, chama nesta ocasión a que sexan os propios habitantes da cidade os que desenvolvan as súas obras artísticas en tea e as poñan nos seus balcóns para adornar as rúas da cidade.
Tamén as Balconadas de Betanzos, que habitualmente pon nas varandas da poboación desta vila obras de arte, muda de formato ante a crise sanitaria. O concello, que organiza o evento, chama nesta ocasión a que sexan os propios habitantes da cidade os que desenvolvan as súas obras artísticas en tea e as poñan nos seus balcóns para adornar as rúas da cidade.
