Falece o académico Xosé Luís Franco Grande aos 84 anos de idade

Escritor, membro da Real Academia Galega, investigador e activista cultural. Xosé Luís Franco Grande falecía este martes 31 de marzo aos 84 anos de idade logo dunha longa enfermidade. Dentro da súa intensa produción ensaística e literaria, Franco Grande resulta especialmente recoñecido pola súa novela Os anos escuros, na que repasa a resistencia galeguista ao franquismo na posguerra civil, e mais polo seu Diccionario galego-castelán, publicado en 1968 e que acumula máis de medio millón de exemplares vendidos.


Parte da RAG desde 1978, o seu discurso de ingreso, lido vinte anos depois, abordou O antigo réxime nunha familia do Baixo Miño. Aínda este mesmo ano 2020 vía a luz en Galaxia a súa última obra, A ilusión da esperanza. De Cabanillas a Xulio Ríos, un volume no que retrata corenta e nove persoeiros históricos do galeguismo. A editorial Galaxia lamentou a desaparición dunha persoa que foi fundamental no seu nacemento e que "deixa un oco difícil de encher", mentres a Real Academia Galega amosou "o seu fondo pesar" polo pasamento. O Consello da Cultura Galega, pola súa banda, lamentou a perda de quen calificou como "unha figura imprescindible no galeguismo de posguerra".