A se sumar á achega de contidos culturais para o confinamento, a Cidade da Cultura acaba de presentar Aventuras no monte das artes "unha actividade en liña que achegará ás familias contidos para que a cativada explore as súas habilidades artísticas a través de xogos e divertidos desafíos". A iniciativa propón axudar á "Raposa Fedella" a resolver retos relacionados con contidos presentes no Gaiás, adaptados para público de educación primaria. Como primeira proposta, o programa convida a investigar arredor do cadro O paraíso terreal, de Pieter Brueghel 'O Novo' ou a Biblia Kennicott, pezas da exposición Galicia, un relato no mundo.
