A epidemia de coronavirus comeza a afectar á axenda cultural

As medidas que as autoridades están a tomar para conter a expansión co coronavirus (Covid-19) no noso país comezan a lle afectar á axenda cultural galega. Deste xeito, a entrega do Premio Literario San Clemente, prevista para o vindeiro 31 de marzo, trasladarase ao vindeiro mes de outubro. Segundo explicou a organización neste 10 de marzo, a dificultade do xurado internacional para se desprazar a Compostela por mor das limitacións en voos internacionais impide que se poida contar cun ditame para a data prevista.

Actualización (16:10): O Carballo Interplay anunciaba na tarde deste 11 de marzo a suspensión temporal da súa vindeira edición, prevista para a primeira semana de abril. A Concellaría de Promoción Económica e Turismo de Carballo, responsable do evento, comunicou que a decisión se tomou "por responsabilidade" e para "evitar risco de contaxio". Segundo explica nun comunicado a organización "aínda que, polo momento, o COVID-19 parece contido en Galicia e as autoridades sanitarias non impiden expresamente manter o Interplay, a maior parte das actividades programadas implicaban a participación de persoas chegadas dende distintos puntos da península e as crecentes recomendacións de limitación da mobilidade da poboación que habita zonas de risco, para evitar a transmisión da enfermidade, levou a organización do Carballo Interplay a tomar esta difícil decisión".

En paralelo, a organización da Mostra Internacional de Cinema Etnográfico anunciaba na mañá deste 11 de marzo a súa decisión de aprazar a celebración do evento de cara á segunda quincena de setembro. Segundo sinalan nun comunicado nas redes sociais "a cancelación da presenza dalgúns convidados/as de relevancia para a programación do festival pola prohibición de viaxar desde algúns países condiciona a celebración e a calidade da mostra. En previsión das medidas que se podan aplicar nos próximos días e por responsabilidade social, tomamos esta medida que, aínda que difícil, é a máis adecuada debido ás complicadas circunstancias que se están vivindo". Tamén xiras como a do grupo portugués Anarchiks, que tiña previsto actuar o vindeiro 20 de marzo en Melide e o 21 na Coruña se están a ver aprazadas por mor das limitación de saídas de Portugal.

Pola súa banda, medidas como a limitación de aforo a un terzo da capacidade dos espazos fechados en Madrid van afectar as actuacións pendentes de Chévere coa súa Curva España. A compañía galega estás a presentar a obra nos Teatros del Canal ata o vindeiro 15 de marzo. Tamén o fallo e da gala de entrega dos Premios MIN da Música Independente, prevista para este xoves12 de marzo, fica adiada polas limitacións a eventos multitudinarios na capital estatal, o que afecta ás diferentes bandas galegas que aspiran a un destes galardóns. É de agardar que en vindeiros días, e a atender ás medidas que se anuncien desde as diferentes administracións, se poidan dar novas cancelacións e adiamentos de propostas culturais.