Coñecer o protagonista do Día das Letras mediante roteiros guiados é unha proposta que está a se consolidar na axenda cultural do país. No caso de Carballo Calero, homenaxeado este 2020, están a se multiplicar as propostas de homenaxe a camiñar, na súa maior parte con Ferrol como escenario. Deste xeito a Asociación Compostelá A Gentalha do Pichel convoca a participar o vindeiro 15 de febreiro nunha excursión á cidade natal do autor para participar dun paseo guiado que coorganiza a Fundaçom Artábria e que desenvolverá a cooperativa Rexenerando. Os centros de ensino da Cidade Departamental teñen tamén aberto o prazo para participar en roteiros desta cooperativa co apoio do Concello.
Para o vindeiro 25 de xullo será José-Martinho Montero Santalha o guía dun Roteiro literario polos espazos vitais de Carvalho Calero en Ferrol, desta volta enmarcado nas actividades de formación do profesorado da Consellaría de Educación.
O 15 de maio diferentes asociacións e colectivos da cidade convocan a quinta edición do Roteiro literario e musical A mirada de carvalho, que percorrerá varias rúas baixo a dirección de Loreto de Castro.
Fóra de Ferrol, o pasado domingo 9, Adela Figueroa guiaba o roteiro O Lugo de Carvalho Calero, organizado pola Asociación Ecoloxista ADEGA.
