Logo de anos de autoedición e de historias breves, Cristián F. Caruncho acaba de lanzar ao mercado o seu primeiro traballo longo no campo da banda deseñada. Grandarroiba, publicada por Demo Editorial, é unha historia de 56 páxinas que segue a biografía dun home que vive no fondo da montaña da parroquia do Couzadoiro, en Ortigueira. A evolución da personalidade do protagonista ao longo do tempo retrata tamén a situación do rural do país.
Pola súa banda, Mariano Casas, a continuar a súa traxectoria de autoedición, acaba de presentar IES WE CAN, un retrato humorístico da situación do ensino secundario e dos seus problemas no noso país.
Ao tempo, o guionista vigués David Braña anuncia para este 16 de decembro, e da man da editora Rocketman Project, o lanzamento de Madeja. Esta historia de suspense e fantasía no que unha muller tentar resolver as mortes do seu pai e do ex-marido, conta con 92 páxinas a cor debuxadas por Carlos Mercé.
