A restauración do Pórtico da Gloria e a Ribeira Sacra, galardoados nos I Premios de Turismo

O Teatro Rosalía de Castro da Coruña acollía na noite deste 3 de decembro a entrega dos I Premios de Turismo de Galicia. Estes galardóns, creados polo Clúster Turismo de Galicia e a Xunta foron para a restauración do Pórtico da Gloria da Catedral de Santiago de Compostela na categoría Patrimonio, mentres a candidatura da Ribeira Sacra como Patrimonio Mundial da Unesco levou o galardón na categoría de Promoción. O Resurrection Fest obtivo o premio como mellor Evento mentres a asociación Camiño dos Faros foi recoñecida no campo da Sustentabilidade.

A axencia especializada no Camiño de Santiago Pilgrim Travel impúxose na categoría Vangarda e a vila de Ribadavia obtivo o premio como mellor Escenario. Houbo recoñecementos tamén para Luz Casal como Embaixadora Nacional 2019, e para Hong-jo Chun, embaixador da República de Corea en España como Embaixador Internacional. O labor de Moncho e Paco Vilas a prol da difusión da cociña do país foi tamén lembrado co premio Pioneiros.


O xurado que realizou a selección estivo composto por Cesáreo Pardal, presidente do Clúster Turismo de Galicia; José Luís Mestre, director de Competitividade de Turismo de Galicia; Alfonso Martínez, representante do Consorcio Turístico de Empresarios de Sanxenxo; Jesús Picallo, presidente de Solpor, Asociación de Empresarios do Camiño de Santiago a Fisterra-Muxía; Sara Santos, presidenta da Asociación Hostalaría de Compostela; Lorena Varela, xerente da Ruta do Viño Rías Baixas; Francisco González, representante no Clúster pola Asociación de Empresarios de Hospedaxe de Pontevedra (ASEHOSPO); José Antonio Fraiz, profesor da Facultade de Ciencias Empresariais e Turismo da Universidade de Vigo; Tomás Abeigón, director de Negocio Turístico de Banco Sabadell; e Rodrigo Burgos, director do museo MEGA: Mundo Estrela Galicia. En total recibíronse máis de 160 propostas aos galardóns.