Os representantes de todos os grupos presentes na cámara galega aprobaron por unanimidade este 27 de novembro instar á Xunta "a que recoñeza ás festas parroquiais galegas como Patrimonio Cultural Inmaterial de Galicia na súa categoría de Ben de Interese Cultural".
A iniciativa, presentada polo Grupo Parlamentario Popular, sostén que "as festas parroquiais constitúen unha tradición cultural viva e arraigada ao longo do tempo, que contribúe decisivamente a conformar a identidade e a cohesión social dos veciños e veciñas de Galicia", ademais de sinalar que "son un elemento cunha importante relevancia para o conxunto de Galicia". De xeito máis específico os populares inciden en que "en Galicia prodúcese un fenómeno particular e único, con fins de semana con máis de 200 festas" .
A proposta recolle a iniciativa da Asociación Galega de Orquestras, á que o Grupo Popular amosa o seu apoio explícito ao tempo que sinala que esta entidade "leva a cabo un traballo encomiable de promoción e divulgación da festa popular galega co obxectivo de que sexa declarada Patrimonio Cultural Inmaterial de Galicia". Na mesma liña, defende que "as orquestras e as verbenas son dous factores claves sen os que non poderíamos entender este tipo de festexos tal e como son".
