Xesús Fraga convértese en vencedor do XXXVIII Premio Blanco Amor de novela

A Deputación de Ourense daba a coñecer este sábado o fallo do XXVIII Premio de Novela Longa Eduardo Blanco Amor, o máis dotado economicamente da narrativa galega. O xurado seleccionou a novela Virtudes e misterios, do betanceiro Xesús Fraga entre as 23 que se presentaron a esta xeira do certame e outorgáronlle o galardón que consiste nunha escultura de Acisclo Manzano e 15.000 euros en metálico. A entrega do premio desenvolverase o vindeiro 30 de novembro nunha cea literaria organizada pola Fundación Blanco Amor no Liceo do Ourense.

A novela, que repasa a vida dunha familia das Mariñas marcada pola emigración, supón segundo o xurado "unha historia asentada na realidade da segunda metade do século XX, ben vertebrada e contada a través dun variado mosaico de lembranzas, sensacións, testemuñas, fotografías e o diario dunha nai". Na acta tamén se destaca "o tratamento da linguaxe e a variedade de rexistros, entre os que non falta a empatía coa actualidade". Luís González Tosar, Laura Caveiro, Luís Menéndez Villalba, Xosé María Dobarro e Eulalia Agrelo foron os compoñentes do comité de selección.