Cecilia F. Santomé. Fonte: Wikipedia
A Deputación de Ourense e mais a Fundación que leva o nome do escritor daban a coñecer este 24 de novembro o fallo da cuadraxésima cuarta edición do Premio de Novela Longa Blanco Amor. A escritora de Vilalba Cecilia F. Santomé impúxose entre os 75 orixinais presentados ao certame con Boundaries Road SW12 8HD. A gañadora recibirá 15.000 euros en metálico e unha escultura de Acisclo Manzano.
A novela narra a historia de Cilla, unha tradutora galega de 30 anos emigrada en Londres que aluga unha habitación na casa dunha parella acomodada. A narración entronca esta peripecia doméstica coa historia do éxodo xudeu de Exipto.
O xurado valorou o estilo "moderno" da obra, que dialoga coa literatura actual e que desenvolve a "creación dun universo narrativo con gran pegada poética", así como as personaxes "elaboradas con moita coherencia". A "introdución da corrente de conciencia da narradora", a aposta pola temática da nova emigración a Europa, ou a voz narrativa "neurótica, culta, irónica e introspectiva" da narradora son outros valores da novela considerados no fallo. Conformaron o xurado Luís González Tosar, Heitor Mera, César Lorenzo e Inés Mosquera, con Noelia García Díaz como secretaria.
Cecilia Fernández Santomé, tradutora e lingüística, ten publicadas tres novelas en Edicións Xerais e conta no seu palmarés con galardóns como o Premio Literario Nortear ou un terceiro posto no Certame de Narracións Breves Manuel Murguía. O galardón entregarase o próximo 5 de decembro nunha gala literaria no Centro Cultural Marcos Valcárcel.
