A BD histórica La espada de San Eufrasio chega ao seu terceiro volume

Novos títulos de banda deseñada de autoría galega chegan ás librarías neste outono. A nivel estatal, Diábolo Ediciones presenta o terceiro volume do ambicioso proxecto La espada de San Eufrasio. A serie histórica que debuxa Miguel Fernández con guións de Pepe Rey e Manolo López Poy continúa con Un Pacto con Satanás, un volume que afonda nas intrigas políticas da Galicia do século XV.

Pola súa banda, da man de Apa Apa Cómics chega ás librarías Socorro, último traballo de Roberta Vázquez. Alimentos antropomórficos protagonizan historias sobre a precariedade e o día a día adubiados con surrealismo e moito humor.

Finalmente, Carlos Trigo acaba de presentar na plataforma Gumroad o webcomic Silver Fox, unha historia de aventuras de 24 páxinas en inglés que ve a luz con guión de Darren Dare e que está dispoñible para descarga.