Santa Baia de Nantes na Galipedia. Fotografía de Adrián Estévez.
A igrexa de Santa Baia de Nantes, en Sanxenxo, acollerá ao longo de cinco meses traballos de restauración que pretenden manter e conservar a súa arquitectura orixinal. A Consellaría de Cultura anunciaba este 19 de novembro un investimento de 170.000 euros neste proxecto, que inclúe tarefas como a eliminación de amianto, substitución de tellas, instalación de canles de zinc ou reparacións na estrutura de formigón. Tamén se desenvolverán obras para garantir a impermeabilidade do conxunto e recuperaranse os faldróns orixinais con que contaba a cuberta así como a celosía de lamas do campanario.
A igrexa construíuse en 1964 coa colaboración dos veciños sobre un proxecto do arquitecto Alejandro de la Sota, homenaxeado do Día das Artes Galegas de 2018. O conxunto integra as propostas do movemento moderno propias do autor coa arquitectura popular da zona, como son o emprego de perpiaño de granito e de tella curva.
