A cuarta edición da mostra de improvisación oral en verso De Repente, en Compostela, que impulsa a asociación ORAL de regueifa terá como núcleo temático o encontro do “repentismo” galego-portugués. Durante tres dÃas, -18, 19 e 20 de novembro-, diferentes actividades dirixidas a todos os públicos e con regueifeiros de Galicia e Portugal converterán Compostela na capital da improvisación cantada galego-portuguesa. O martes, 19, tres experiencias educativas que teñen como obxectivo modernizar e actualizar a regueifa nos seus territorios van ser protagonistas do encontro central. Un festival reunirá a Regueifesta galega, o Festcordel de Avanca (Portugal) e o Projeto Repentismo da illa da Madeira. Tamén haberá espazo para a reflexión con dúas mesas redondas onde falarán, nunha delas crianzas e adolescentes sobre a súa experiencia, e outra con profesorado e activistas que analizará o momento actual da regueifa no entorno galego-portugués. O mércores, a Mostra trasladarase a Baio, ao IES Maximino Romero de Lema, onde terá lugar o Encontro de Repente Interxeracional Galego-Portugués, e no que participarán as novas xeracións bergantiñás da regueifa con varios regueifeiros de idade, ao lado dos repentistas portugueses.
