As bibliotecas énchense de actividades polo seu día

A celebración este 24 de outubro do Día das Bibliotecas está a achegar a estes centros un completo programa de dinamización. Os centros que dependen da Consellaría de Cultura contan con obradoiros, visitas guiadas, concursos, contacontos e exposicións que se desenvolverán alén desta data. Ademais, na Biblioteca de Galicia abre hoxe a mostra Querida Biblioteca, que, segundo anuncia a consellaría "difundirá o valor estético e documental das tarxetas postais, un material do que se custodian neste centro da Cidade da Cultura máis de 3.000 exemplares".

Pola súa banda, desde a Dirección Xeral do Libro e Fomento da Lectura do Ministerio de Cultura anúnciase o comezo de celebracións temáticas na data a partir deste ano. Deste xeito, incorpórase o lema Aptas para todos os públicos ás celebracións e este ano céntrase a conmemoración na igualdade de xénero neste campo.

A coincidir coa data, a Real Academia Galega acaba de publicar no seu web un manual Sobre el modo de ordenar, y componer una librería escrito no século XVIII polo monxe alemán Oliver Legipont e conservado na biblioteca de Emilia Pardo Bazán.