As bibliotecas celebran o seu día cunha chea de actividades

A celebración hoxe 24 de outubro do Día da Biblioteca leva a estes centros un bo feixe de actividades que pretenden achegar a cidadanía á lectura. Espectáculos, obradoiros, xornadas de portas abertas, contacontos, visitas guiadas, liberación de libros e mostras bibliográficas son algunhas das propostas que se celebrarán nas bibliotecas do país. Entre elas, a Ánxel Casal de Santiago de Compostela entegará como cada ano os seus premios Superlectores aos usuarios que máis uso lle teñan dado ao carnet de socio. En Pontevedra, pola súa banda, daranse a coñecer os gañadores do IV Certame de Relato Curto.





Canda a isto, haberá visitas guiadas, como as que programou a Biblioteca de Galicia ou actividades que amosan as posibilidades destes centros na atención á diversidade, como as que organizan a coruñesa Miguel González Garcés e a Juan Compañel de Vigo. Exposicións bibliográficas e iniciativas de formación de usuarios como o obradoiro Quen matou a bibliotecaria en Compostela son algunhas das propostas dun programa que se prolongará ao longo dos vindeiros días. Así, o 25 de outubro a biblioteca de Compostela acollerá ás 18:30 horas o espectáculo As Parábolas de Pakolas, e o mesmo día ás 20:00 horas, a Miguel González Garcés da Coruña acollerá a conferencia Tradición, creación e perversións na cultura galega a cargo do arqueólogo e museólogo Felipe Senén. A conmemoración a nivel estatal conta cun pregón do Premio Nacional de Literatura Infantil 2016, Alejandro Palomas, e cun cartel do ilustrador Manuel Marsol.